إنجي علاء تكشف آخر تطورات حالتها الصحية بعد العملية الجراحية الخطيرة

 كشفت المؤلفة إنجي علاء، تطورات حالتها الصحية بعد العملية الجراحية الخطيرة التي أجرتها مؤخرا 

وقالت إنجي علاء:"فات شهر تقريبا والتعافي صعب.. الحمد لله على كل شيء.. في أيام احسن من أيام وأملي في ربنا كبير.. وفي أيام ناس بتظهر تهونها بشكرهم من كل قلبي، انا كان لازم اعمل العملية أو يمكن اخسر العصب نهائي أو تتعمل العملية وممكن تحصل أضرار لأن العملية في مكان دقيق في المخ والعصب بقاله سبع سنين متضرر بندعي ان المضاعفات تكون مؤقتة يا رب يا كريم".

وتابعت:"محتاجة دعواتكم في الفترة الصعبة دي وشكرا لكل حد حاول يساعد بأي طريقة، ربنا يخليكم وشكرا لدعواتكم كلكم كل دعوة ليها مكانة كبيرة اوي عندي".

وأوضحت:"بالنسبة للي بيحصل في السعودية قلبي واجعني.. ربنا يحفظ بلد الحرمين الشريفين وأهلها الكرام ويحفظ مصر من كل سوء يارب وسائر البلاد العربية، وبلاد المسلمين، ويعم السلام والأمان على بلادنا، ويهدي الجميع لما فيه الخير والصلاح".

واستكملت:" بالنسبة للصناعة انا مستغربة من الصحوة اللي حاصلة دلوقتي! اشمعنى؟! من تقريبا سبع سنين وبدأت حاجات تزيد عن حدها منها الشللية وعدم احترام الإبداع وسرقة الأفكار وضيق الوقت ومع ذلك سعيت وحاولت بس ساعات طلبات النجوم اوطلبات الموزعين والمنتجين وغيره بتكون اصلا مضرة للدراما.. (مع ان الصناعة بره قايمة على انهم الأول بيتعاقدوا على المعالجة اوالسيناريو وبعد كده يجيبولهم اللي يناسبهم!).. واخر حاجة بنتكلم فيها واللي كنت بزعل اوي مع كل ميتنج بخرج منه عليها واللي ساعات محدش بيتكلم عنها اصلا هي جودة العمل فنيا فبالتالي وصلنا للي وصلناله وكان متوقع.. بصراحة ياما شفت ظلم وياما وياما وغيره.. كانت حرب والله عشان تقدر تطلع عمل فني محترم وفي الاخر اخترت احترم نفسي والدراما والجمهور واتفرج من بعيد.. مانكرش اني اتأثرت على كل المستويات بس احسن من اي سقطة فنية.. الحمد لله على كل شيء".

وتابعت:"وحقيقي بعبر عن إعجابي وتقديري بالقلة اللي قدرت تطلع أعمال كويسة في ظل الظروف دي.. فترة المرض غيرت نظرتي للأمور.. اكني بقيت شايفة الدنيا من بره.. مافيش حاجة تستاهل القهرة والاستنزاف والله".

وأضافت:"احمدوا ربنا على الصحة دي نعمة كبيرة، وراحة البال نعمة، ورضا الله اهم نعمة، والعمر أقصر من اننا نضيعه في الضغط والقهرة والزعل..ربنا يشفي كل مريض، ويجبر بخاطر كل موجوع، ويرزقنا جميعا الصحة وراحة البال وطمأنينة القلب، دعواتكم".